كتب/ غازي غريب

الدوري انقسم نصين .. هايصين ولايصين

حتى قبل أن ينتصف الدوري بأسبوع واحد .. بانت معالم الدوري الفلسطيني الممتاز في المحافظات الجنوبية .. مفش وسط .. يا فوق يا تحت .. وحتى بالنسبة للناس إللي فوق والناس إللي تحت .. لسه الأماني ممكنة .. وجميع التوقعات واردة .. في البطولة والهبوط .. سته تحت راحت عليهم فرصة البطولة و الهبوط وارد .. وسته فوق حظوظهم واردة ويمكن متساوية .. وفي المستويين بدأت مرحلة كسر العضم مبكرة .. الصداقة لو ما كانش جوه أندية غزة كان بإمكانه حسم البطولة من بدري .. وهذا من أسباب غياب البطولة عن فرق مدينة غزة .. ليش ؟ .. كل ما زادت فرق غزة في الدوري كل ما انخفضت وانعدمت فرص البطولة .. معادلة بتحدث كل موسم .. فرق غزة بتعاني من ست دربيات وما حدش بيحط واطي للتاني وبتخسر نقاط جوه غزة أكثر من ما بتخسر نقاط بره غزة .. والدم ع الدم جسور .. مع إنها بتطلعش من ملعبها إلا خمس مباريات من اتنين وعشرين مباراة .. يعني الفرق الكثيرة من المدينة الواحدة نقمة مش نعمة .. وبأعتقد إنو بس الصداقة من أندية غزة بينافس بقوة على البطولة .. والشاطئ الأمور صارت تتصعّب قدامه .. وباستثناء خدمات خانيونس .. الأربع فرق الباقية من رفح وخانيونس حظوظها كبيرة في البطولة .. ومن ناحية الهبوط .. ثمانين في الميه الهابطين من فرق مدينة غزة .. وعشرين في المية فريق من غزة ومعاه خدمات خانيونس .

• طيب والحكام : شكاوي كل زمان ومكان .. بالنسبة لحكامنا نبوس إيدينا وش وضهر ونحمد ربنا على النعمة إللي إحنا فيها .. عشان إللي بيشوف بلاوي الناس بتهون عليه بلا ويه .. شوفوا كلاسيكو الكون البرشلوني المدريدي إيش كان فيه بلاوي في عدم احتساب ضربات الجزاء .. حكام بالملايين وحكام بالملاليم .. والملاليم تكسب ( وعذراً للتشبيه ) .

• ولجنة الانضباط : في اتحاد الكورة .. عفواً .. بالسلامة والقلب داعيلكو .. عشان بيلزمكو حبوب الشجاعة قبل ما تتخذوا قراراتكو وتحرجو اتحاد الكورة .

• ولجنة المسابقات .. ربنا يعطيكو العافية .. بس والله سؤال برئ .. ترتيب أسابيع الدوري والملاعب والمواعيد .. أجت هيك لحالها ؟؟؟

• وفرق الدوري في كلمتين :

• أولاً الناس إللي فوق :

• الصداقة : ثلاث هزايم من عشر ماتشات صعبة كتير .. رغم إنكو الأكثر فوزاً وتهديفاً .. أنا أدق أجراس الخطر .. البطولة في الملعب

• شباب رفح : زي شباط ما عليهوش رباط .. ولازم يخلص من شباط .. ولازم الإدارة تحسم القرار بتغيير عتبة بيت الفريق .. ما زال المرشح الأول للبطولة الغائبة من سنتين وشوية .

• اتحاد خانيونس : تجري جري الوحوش غير رزقك لن تحوش .. كان لازم توخد البطولة من ثلاث مواسم فاتت .. واليوم البطولة قدامك .

• شباب خانيونس : كالعادة .. بتلبد بين الشجر وبعدين بتظهر من تاني .. مستوى ثابت .. والبطولة متاحة إلا إذا طمعت في الكاس .

• الشاطئ : لسه الفرقة في مرحلة نقاهة من مواسم عجاف فاتت .. راحت وأخذت الشر معاها .. ورغم إنو البطولة لسه في الملعب .. إلا إنو عندي إحساس بأن موسم الشاطئ اليوم موسم إنطلاقة لموسم البطولة المقبل مع تقوية بعض المراكز ومنها حراسة المرمى .

• خدمات رفح : ............................. لا تعليق .

• التفاح : المنطقة الدفيانة في سنة أولى ممتاز .. إنجاز .

• الشجاعية : الثلاثية إللي كانت .. نعمة مش نقمة .. وكمان خمس هزايم من عشرة .. يعني فيه حاجات كثيرة غلط .. والشجاعية إللي كان من الناس إللي فوق يصير من الناس إللي تحت .. شيء مش طبيعي ومش معقول .. الشجاعية بدها إنتفاضة كروية .

• الأهلي : مالك زي آذار .. يوم شميس ويوم امطار ويوم مكاكاة الشنار .. إرسيلك على بر .. ويارب يكون بر السلامة .

• خدمات خانيونس : لسه في مرحلة الخطر .. رغم جماهيريته .. فيه خلل في صفوفه الخلفية .. 15 هدف تهتز بها شباك الفريق في 10 ماتشات .. ألف إشارة حمراء .

• الهلال : مش كل مرّه بتسلم الجرّه .. الطريق قدامك أصعب من طريق الموسم إللي فات .. بتقدم عروض حلوة بعكس النتايج .

• غزة الرياضي : حسرة علينا يا حسرة علينا .. محتاج معجزة .

• والدرجة الأولى .. دوري المظاليم :

ليس أقل إثارة ومتعة من دوري آلاف الدولارات ( الاحتراف المقنّع ) .. معالم الصعود للممتاز بدأت في الظهور .. وأيضاً مؤكدات الهبوط لدوري النسيان .. وللأسف الشديد .. المغازي والبريج هما المرشحان .. في مأساة كروية جديدة تضاف للمنطقة الوسطى .. والمطلوب الآن الآن وليس غداً لرجالات الوسطى التداعي إلى عقد مؤتمر كروي خاص بها لوضع الحلول للخروج معاً بحلول لتفادي ووقف أزماتها المتلاحقة .. وأدعو زميلي خيري أبو زايد للمتابعة .. الوسطى عزيزة علينا .. أما عن الصعود للممتاز .. القادسية الرفحي وضع قدمه على أول سلم الصعود .. ومعاه شباب جباليا .. ولسه الأماني ممكنة وبالتساوي للزيتون والجلاء وخدمات النصيرات .. باقي 36 نقطة في 12 أسبوع .. بتومت فيها ناس وبتحيا ناس .. وبتطلع ناس وبتنزل ناس .

وفرق الأولى في كلمتين :

• القادسية الرفحي : عيني عليهم باردة .. حبيبي أبو عمر السطري وولاده الجهاز الفني واللعيبة .. ما شاء الله على فريقك حبيبي نادر النمس .. أقوى هجوم وأقوى دفاع .. متربع لحاله ومدندل رجليه على القمة بالنقاط والأهداف .. رفح منجم الكورة .

• شباب جباليا : ماشي في السليم .. ولسه الخوف واقع .

• الزيتون : جرالكم إيه ياولاد الخال .. كنا ماشيين كويسين .. ارجعوا لبدايات الدوري .. والصعود لسه في الملعب .. كونوا من يضحك أخيراً .

• أهلي بيت حانون : ثاني أقوى هجوم .. وعلى المربع الذهبي ناوي .. إنجاز كبير .. وإلى الأمام .

• خدمات النصيرات : مكانك مش مقامك .. خسارة على الأصيل لمّا تبهدله الأيام .

• الجلاء : السنة إللي فاتت كان فاضل على الحلو دقّه .. والسنة قدّامة دقّات .. إلعبوا على المربع الذهبي ياولاد أبو رمضان .

• بيت لاهيا : الفراولة أول طلعتها من تلات سنين كانت أحلى وأغلى .. مال حلاوتها بتنقص يوم عن يوم ياولاد حسين عليان .

• الاستقلال الرفحاوي : كويس إللي لحقت حالك .. ووقفت على حيلك .. ويارب ترجع لعوايدك .

• خدمات جباليا : للمرة الألف .. تحتكر بطولات الناشئين من سنين .. وفي الكورة دايماً في المؤخرة .. وين بيروحوا الناشئين الأبطال لمّا يكبروا ؟؟؟؟؟

• الصلاح : لم أشاهده هذا الموسم .. لكن مع شادي أبو عرمانه .. كل إللي بدكو إياه بيصير .

• خدمات البريج : طوق النجاة بده رجولة لعيبة السلة

• خدمات المغازي : غطيني يا صفية مفيش فايده آخر الكلام منحة فخامة الرئيس أبو مازن المأمولة والمنتظرة لأندية القطاع .. تعادل بقاء واستمرارية الدوري .. ويارب على هالطلق الشديد غلام .