والمقصود الدوري الفلسطيني الممتاز في جنوب الوطن .. دوري " جوال " ورعايتها لكورة عموم الوطن .. هواة ومحترفين .. ودورينا إلو أهمية اعتبارية خاصة .. ناس طالعة من حرب مدمرة وبتعاني من الألم وارتفاع مستوى الفقر ودمار وحصار .. وبرضه بتلعب كورة .. وهنا تكمن عظمة غزة التي سرعان ما تتناسى آلامها وتتجاوز محناتها .. وكان نفسي أكتب عنوان مختلف بس لقيت العنوان كبير وطويل " ما تستغربشي ما تستعجبشي .. فيه ناس بتلعب ولا تكسبشي .. وناس بتكسب ولا تلعبشي " وهذا ما لاحظته خلال معظم الماتشات الأربعة وأربعين من عمر الدوري .. والعبد لله شايف وياريت نظرتي ما تخيب إنو مستوى الدوري الحالي سيكون أفضل من دوريات سابقة .. مهاريا وبدنيا وجماهيريا ..  وتنظيما اتحاديا أيضا .. وكمان مستوى أفضل للحكام .. وفوق كل هادا شغل إعلامي رياضي يتطور يوم بعد يوم .

لكن مستوى التهديف ضعيف .. ممكن ارتفاع مستوى حراس المرمى .. وممكن تألق المدافعين .. وممكن ندرة الهدافين .. وممكن كل هادي الأسباب مجتمعة .. مع توقعاتي بارتفاع نسبة التهديف خاصة إنو الموسم لسه بأوله .. والأرقام بتقول إنو بعد نهاية الأسبوع الرابع بلغت حصيلة الأهداف 58 هدف في 44 ماتش بمعدل 1,3 هدف في كل ماتش .. وباين كمان إنو ثلاث فرق كانت مهددة بالهبوط .. الهلال والشاطئ والشجاعية .. الموسم الماضي ومعاها الصاعد من الأولى خدمات خانيونس .. أخذت مكانها في مواقع متقدمة على حساب فرق كبيرة زي شباب رفح وشباب خانيونس وغزة الرياضي المثقلين بالهزائم المبكرة .. ويستثنى من هذه الظاهرة اتحاد خانيونس والجمعية الإسلامية .. ورغم إنو العبرة بالخواتيم .. والخواتيم لسه بدري عليها إلا إنو فيه عناوين مبينة من أولها من غير أسامي خوفا من الإحباط .. وايش عملت الفرق في أول أربع أسابيع :

  *    اتحاد خانيونس : في نسخة مكررة من الموسم الماضي .. راكب الدوري .. بأقوى هجوم جايب 1/5 ( خمس ) أهداف الدوري لحد اليوم .. ولازم يتعلم من تجربة الدوري إللي فات .. علشان الآخرة يا فاخرة .. مرشح قوي للبطولة .. يلعب بروح قتالية عالية .. وجماهيره بتفلق الصخر وبتنطق الحجر .

  *   الهلال : فايع من أولها ومتصدر بتلاته فوز مع الاتحاد .. رغم إنو قوته الهجومية ضعيفة .. أربع جوان في أربع ماتشات .. لكن عنده قوة دفاعية كويسة بالرغم من غياب مدافعه البواب .. ممكن ينافس على مراكز متقدمة فقط لا غير .

  *  خدمات رفح : بصراحة .. أكثر فريق ملا عيني كورة .. وبيقدم أحلى كورة في غزة .. وبينه وبين بطولة الدوري قليل من الحظ .. وحرام البطولة ما تكونش من نصيبه .. ومطلوب منه زيادة قدراته الدفاعية بواحد جنب البهداري .. وربنا يسلم النيرب ( بطاطا ) من شر الإصابات .. والجميع يسيب أبو عرب يشتغل براحته .

 *      الجمعية الإسلامية : هوه هوه ما بيتغيرش .. ويا خسارة .. الحلو ما يكملش إلا براس حربة سوبر هداف .. وهادا شرط من شروط البطولة .. حراسة المرمى والقوة الدفاعية ما عليهاش كلام  .. لكن النص متواضع والهجوم بلا أنياب .

 *       الشاطئ : صحيح .. مش كل مرة بتسلم الجرة .. ويوم عسل ويوم بصل ما ينفعش .. لكن اليوم مستواه الفني والبدني مع الدعم الجماهيري أحسن كتير من السنين إللي فاتت .. وكمان مش حيعاني معاناة فاتت .. الله لا يرجعها .

 *       خدمات خانيونس : صعد ليبقى ويستمر .. والمفاجأة مش في لعيبته .. المفاجأة في جماهيره .. وبالطول والعرض الخدمات بيهز الأرض .. إذا أنهى الدوري في النصف الأعلى من الجدول بيكون كتر خيره .. وياسلام لو واحد جنب فحجان .. كان إللي بيتمناه حصل وكان .

 *    الشجاعية : كنا وين وصرنا وين .. ثاني الفرق تهديفا بعد الاتحاد .. 8 أهداف في 4 ماتشات .. لكنه اليوم أضعف خط دفاع 10 أهداف دخلت مرماه نصها في ماتش واحد .. ماتش لن يتكرر لو أعيد ألف مرة .. وخدوها مني : الشجاعية مع العائد بقوة علاء عطية وزمايله حيكون له مكانته في الجدول من فوق .

 *     شباب خانيونس : واحد من تلاته مع شباب رفح وغزة الرياضي .. ارحموا عزيز قوم ذل .. وشباب خانيونس عايز ترميم دفاعي كامل .. وحسن حنيدق مش دايم طول العمر في اللعب .. ربنا يعطيه طول العمر بعد الاعتزال .. بمعنى السباب عايز لعيب تقيل في النص علشان يشغل بركات .. والسنة هادي كمان بعيد عن البطولة إلى أن ينضج الناشئين .. والمدرب لازم يستغل الفرصة ويبني فريق جديد

*غزة الرياضي : عمره ما كان هيك .. مريض بنتايجه .. والرياضي طول عمره بيعطي لعيبة للفرق التانية مش بيجيب منهم  .. بأول مدرسة كورة عرفتها غزة .. وقلنا آه قلنا لأا العميد اليوم في أزمة كروية .. لازم يطلع منها بدري  ومجلس إدارته بعون الله قادر يحلها .. والحل مش في تغيير مدربين .. الحل في سياسة كروية جديدة وكوادر النادي ما شاء الله عليهم .. يسيبوا الكلام ويساعدوا في العمل .. ومش عايزين الرياضي ينافس على البطولة .. المهم يكون في موقع ملائم للحالة في الجدول مع وضع خطتين قصيرة وطويلة الأمد .. والبطولات الجايات أكثر من الرايحات .. والله يعينك يا عمدة ياهاشم على حملك .

* شباب رفح : فريق مجروح .. والحمد لله بدأ يداوي جرحه قبل ما يكبر ويستفحل .. وإللي صار خليناه ورانا .. واحنا ولاد اليوم وبكره .. وكمان مرة الحمد لله شباب رفح وجماهيره فاقوا من الصدمة الغير مسبوقة بدري .. ما عندوش نقص لعيبة .. وهادولا همه همه اللعيبة إللي جابوا خمس بطولات في سنتين  2012 – 2014 وكان ناقصهم عودة الروح القتالية واستعادة عادة إدمان البطولات .. وإللي انتقد كان بسبب غيرته وحرقته على شباب رفح .. وست نقاط بينه وبين المتصدر سهل تعويضها .. ما هوه زمان عوض إللي أكتر منها .. وهاي الساحة والميدان .. ومع الحولي بنستنى يوم الشجعان .

* خدمات البريج : هوه إللي بينطبق عليه المثل " أعطيني حظ وارميني في البحر " .. بيعمل كل حاجة في الكورة والفوز معانده .. والنحس راكبه .. المزين عمل توليفة حلوة والفريق متعوب عليه وخطوطه متجانسه .. ولازم يطلع من خضة اللعب لأول مرة في الممتاز ويحقق فوزه الأول وبعدين الأمور حتدحل معاه .

* النصيرات : فريق اللوغاريتمات .. ونفس بدايات الموسم إللي فات .. ويوم لعب فوق ويوم لعب تحت .. وفيه حاجة غلط في الفريق إن شاء الله زكريا أبو دلال يقدر يحط إيده عليها ويحلها .. ومشوار النصيرات صعب في صراع البقاء علشان معظم الفرق في حالة فوقان .. وما فش فيها لا صغير ولا كبير .. وشوف صاحبك الهلال قاعد وين 

والمظاليم .. ماشيين في السليم

بصراحة .. أول مرة بأهتم بهالشكل بدوري الدرجة الأولى .. دوري المظاليم إعلاميا وجماهيريا .. والأوله في الغرام وباللعب عجبوني .. ومش من الممتازة وتحتها بكتير .. إن لم تكن تتساوى معها في بعض المباريات .. وبلعيبه أفضل في التهديف والمهارات .. وروح قتالية مش موجودة عند بعض فرق الممتاز .. كمان اهتمام كبير من لجنة الحكام في إدارة الماتشات .. لكن لسه معدلات التهديف ضعيفة زيها زي الممتاز .. 56 هدف في 44 ماتش حتى الآن بمعدل تهديفي 1,2 في كل مباراة .. يمكن علشان الخوف من المجازفات الهجومية .. والعبد لله ما شافش كل الفرق .. لكن بدي أحكي عن إللي شفته :

·       * الأهلي : المتصدر في مكانه الطبيعي تاريخيا في طريقه للعودة وبسرعة لمكانه المعتاد بين الكبار .. ورغم الغيابات والاستغناءات يظل الأهلي هو الأهلي والممتازة بتغنيلك " مستنياك "

* القادسية الرفحي : الثاني بفارق نقطة واحدة عن المتصدر .. يقدم كورة حلوة بكافة خطوطه وعنده شادي أبو عرمانة أخو للعيبة قبل أن يكون مدربهم وإدارة " دوس واحنا وراك " .. وإذا استمر على هالمنوال ومن غير أية مفاجآت .. أنا شايفه السنة الجاية في الممتاز .. وقلبي دليلي .

* خدمات جباليا : حاجة بتحير .. نادي بيحتكر بطولات الناشئين من عشر سنوات .. ولليوم مش في الممتاز .. وين الغلط ؟؟

* بيت لاهيا : فرط في سمعته الكروية إللي أخدها أول الوسم إللي فات .. بعدين صار يتراجع مع إنو كل شئ متوفر له .

* الصلاح : إن شاء الله بأشوفه عن قرب .. لكن نتايجه بتقول بيجيب جوان وبيخش فيه زيها .. وحاسس إنو رايح للمربع الذهبي .

* الزيتون : ما تقولش كنا وكان .. ياريت ده كله ماكان .. وين الزيتون بتاع زمان  .. وبعودة إن شاء الله للكبار .

* بيت حانون : يتشابه مع الصلاح والزيتون .. ولما أشوفه حاكتب ما سيكون .

* المغازي : إيه إللي أنا شايفه ده .. إيه إللي بيحصل ده .. بداية ضعيفة .. ودفاعات أضعف .. ومع نادر النمس بإذن الله سيعود إلى عهدنا به .

* الجلاء : نفسي أشوفه .. لكنه حسب نتايجه يتشابه مع المغازي وشباب جباليا .. وأنا حاسس إنو الجلاء ذات يوم بعد الموسم الحالي سيحتفل بيوم الجلاء عن دوري المظاليم .. ومن معرفتي بالصديق الدكتور ماجد أبو رمضان رئيس النادي .. راجل عملي وهدفه قدامه .

* شباب جباليا : صعب يرجع لمستواه المعروف عنه في الممتاز .. فرط في أفضل مدافعيه ومهاجميه .. النجار والزعانين .. لكن لسه الدوري بأوله .. ما زالت عنده مقومات الفوز وتنقصه الروح القتالية .

* الاستقلال : امبارح أحسن من اليوم .. وبإذن الله حيرجع أفضل مما كان .. رجولة في الملعب .. وتنقصه النزعة الهجومية .

* أهلي النصيرات : ما عنديش حاجه أقولها عنه .. وربنا يستره من الهبوط   إلىعالم النسيان .. وما نيل المطالب بالتمني . 

جميع الملاعب .. والله غالب 

مشاكل الصحفيين مع المراقبين .. والصحفيين دايما همه الغلطانين .. علشان تطبيق القوانين .. مع إنو القوانين مخروقة في معظم الأحايين .. ومن الظلم نقول : العيب عند الصحفيين .. واتحاد الكورة لازم طلع بره وشاف كيف الأولوية دايما للصحفيين .. وتحديد الملاعب مش موجودة إلا عندنا .. والعبد لله ببطاقته الصحفية دخلت ملاعب في مصر وسورية والأردن والمغرب .. ولما تكون كاميرتي معاي كنت أخش على التراك طوالي .. وكل الصحفيين من رفح لبيت حانون يادوب قد المصورين إللي بيكونوا ورا الجون .. واتحاد الكورة معذور في حالة الملاعب .. لكن هنه ملعبين اتنين " المكان ضيق والحمار رفاص " في ملعبي رفح والدرة .. أما باقي الملاعب في اليرموك وستاد خانيونس والمدينة الرياضية في خانيونس فيهن متسع لاستيعاب المصورين والصحفيين من كل صنف ولون .. والمراقبين في هادي الملاعب مش لازم يقفوا ع النقرة و ياش يا واش .. وليش الدق والنق بس ع الصحفيين .. والملعب مليان من التانيين .. وبالنسبة لملعب رفح الحل موجود وما بدوش تعب ولا موازنات .. من سنة فاتت حكيت مع زميل الدراسة والصديق صبحي رضوان رئيس البلدية بشأن إزالة الشبك الجنوبي والاستعانة به في غلق العشرة متر المسافة بين الدرج الغربي والمدرج الشرقي مع باب لدخول الفرق والحكام والصحفيين .. ودكتين الاحتياط يرجعن تحت المدرجات زي المدينة الرياضية .. خاصة أنه وبعد تواجد الشرطة انتهت محاولات الجمهور للنط جوه الملعب .. ورئيس البلدية ما نظرش للاقتراح نظرة جدية .. واتحاد الكورة بإمكانه الجلوس معاه وطرح الموضوع .. وكمان ملعب الدرة فيه إمكانية توسيعه من الناحية الجنوبية .. يعني اسعى يا اتحاد الكورة وحاول .. وربنا يجيب إللي فيه الخير .