غازي غريب
وابتدا .. ابتدا .. ابتدااااااااااااا .. ابتدا المشوار وبإذن الله مفش خوف من آخر المشوار .. عشان هادي غزة يا سادة ياكرام .. أخت الشمس وبنت القمر .. لا خايفه من هدير البحر .. ولا خايفه من غدر البشر .. وحتى لو أخوها قاعد بيرمي طوبتها طوبه ورا طوبه برضه حتظل وتستمر هيه الصورة وهيه أول وآخر المنظر . والكلام عن الدوري الفلسطيني الممتاز .. اسماً ومسمىً .. قلباً وقالباً .. وغلطان ستين غلطان إللي بيقول عنه دوري غزة .. لا يا سيدي .. الدوري الفلسطيني أباً عن جد .. وكمان هوه الأصل من يوم دوريات ما بعد النكبة وأقواها على الإطلاق دوريات الستينيات التي صنعت المنتخبات الفلسطينية في المحافل العربية والآسيوية حينذاك . اتحاد الكورة أعلن جهوزيته لانطلاقة المشوار خلال ساعات .. بإدارته وبلجانه رغم قلة الماديات التي تصل إلى حوالي تلتميت ألف شيكل للموسم القادم للمصروفات الجارية .. والاتحاد بالانتخابات عمل إنعاش وتنشيط REFRESHING ونص جديد .. والعزيمة حديد .. في الإدارة واللجان .. والأندية كمان جاهزة من مجاميعه إلا الموازنات .. لكنها حتمشي أمورها بايش ما قالوا شالوا .. ومع الممتاز يحلو الكلام :
• التفاح : كان زمان وبعد عشرين سنة رجع الآن .. نتائجه الودية مقبولة .. وجماهيره بدها تقييد خوفاً من الفلتان .
• الأهلي : والله زمان .. زمان والله .. وأنا مع توقعات زميلي أحمد سلامة بأنه حيكون الحصان الأسود .
• الشاطئ : فريق كبير .. فريق عريق .. لكن ولاده جاروا عليه .. جاب صفقات .. لكنه محتاج عودة روح البحرية .
• الصداقة : مشكلته إنو مش نادي جماهيري .. كل ما يقرب من البطولات بيبعد .. حيكون نفس الموسم إللي فات .
• الهلال : يارب يكون هلال الموسم الماضي .
• الشجاعية : الأسد يمرض ولا يموت .. الودي غير الرسمي .. عانى من شبح الهبوط ولكنه بعدها حقق الثلاثية .. جماهيريته سر قوته .
• الرياضي : سؤال محيرني .. هوه ما كانش عنده فريق كورة خالص عشان يتعاقد مع أكثر من عشر لعيبة .. وين مدرسة الكورة المشهورة ؟؟؟ حاله اليوم مش حال فريق بطولة .
• شباب خانيونس : بيشرق وبيغرّب وبتظل ريحة البطولات فيه ..
• خدمات خانيونس : فريق مالوش أمان .. سواء الفوز أو الخسران .. الله يرحم أيام زمان .
• اتحاد خانيونس : راح منه الدوري قبل ثلاث سنوات بضربة حظ .. وهاداك الموسم صعب إنو يتكرر .. ويارب أكون غلطان ويتكرر .
• خدمات رفح : نغمة بناء الفريق نغمة مدمرة .. هوه مش أخذ الدوري إللي فات بنفس اللعيبة والا لأ ؟؟
• شباب رفح : كان الله في عونك مع جماهيرك إللي رفعت سقف توقعاتها .. واحد من المرشحين للبطولة وليس المرشح الأوحد .. بشرط جماهيره لا تتسبب في نقل مبارياته عن ملعبه .. نصيحتي اللعب بطريقة 3 / 5 / 2 .
• ملاحظة جديرة بالاهتمام : قبل الهنا بسنة .. بطل الدوري الجاي واحد من الأندية الجماهيرية : الشاطئ , الشجاعية , شباب خانيونس , اتحاد خانيونس , شباب خانيونس , خدمات رفح , وشباب رفح .. إذا جماهيرها احترمت حالها وما نقلتش مبارياتها .. بالعقوبات .. خاصة باين اتحاد الكورة مكشر من أولها .
شكراً أمواج
كان رائعاً تبني أمواج لبطولتي الشهداء في الجنوب وغزة .. وهذا يدعونا للتفكير والتخطيط لبطولة رسمية سنوية ثالثة للخروج من نكبة الراحة السلبية الطويلة جداً التي عانت منها الفرق بعد نهاية الكاس والتي وصلت إلى حوالي ست شهور .. وعشان اتحاد الكورة بإمكانياته المالية المحدودة إللي يا دوب تصرف على الدوري والكاس .. ياريت أمواج بالتعاون مع أية شركة وطنية تقدم الدعم المالي المطلوب لاتحاد الكورة وشئ من الدعم المالي للأندية لتنظيم بطولة رسمية ثالثة تحت أي مسمى وياريت تكون "بطولة العودة " .. بالنظام المناسب لسد الفجوة الزمنية الطويلة جداً بين نهاية وبداية الموسم التي تعود بأضرارها على لياقة اللاعبين وأقترح خروج المهزوم في الأدوار الأولى ودوري كامل في دور الثمانية أو دور الأربعة حسب الظروف المتاحة .. والا إيش رايك أخوي أبو اسماعيل .
آخر الكلام والكلام للزملاء الصحفيين الرياضيين ..
بيكفينا إللي كان يحصل معانا على أبواب الملاعب .. واليوم لازم نحترم أنفسنا قبل احترام الآخرين لنا .. خلينا نوصل الملاعب قبل انطلاقة الماتشات قبل نصف ساعة .. وإللي معندوش وقت وعليه شغل ممكن يؤخره وييجي والماتش شغّال بلاش يحضر من أصله ويطلب من واحد من زمايله يغطي له إللي بده إياه .. وبعدين اتحاد الكورة بلاش تحديد الحضور الصحفي إلا للضرورة القصوى وفي ملاعب محددة مثل ملعب رفح .. أما ملاعب اليرموك وستاد خانيونس والمدينة الرياضية ففيها متسع لكل من يقول أنا صحفي .. والله المعين gh-k-gharib51@hotmail.co